A ga se go simolola?

| Wednesday January 29, 2014 15:22

Go a tle go nne go utlwale fa dingwe tsa dikgwebo/ditiro tse di tlhamilweng ka lenaneo le di sa tswelele sentle. Go twe dikgwebo di a tle di simolole di solofetsa, go bonala e kete beng ba tsone ba tlaa roba sengwe mo go tsone, mme e re go ise go ye gope, di phutlhame.

E a re go direga jaana bangwe ba belaele gore ke gore dingwe dikgwebo di simolotswe beng ba tsone ba ise ba nne le lepe lesedi la gore tota kgwebo e tsamaisiwa jang.

Go leka go thusa, ga twe e ne ya re kwa dithutong tseo, mongwe modiri wa ofisi ya Banana kwa Masunga, a gatelela gore pele ga monana a ka tla go kopa go thusiwa, a a lebalebe, a bone gore tota o eletsa go bula kgwebo ya mohuta ofe, le gore a o itse sentle gore kgwebo eo e tsamaisiwa jang.

Kgakolo e ne e le gore, a bana ba se kgatlhwe fela ke gore ba kopile madi, mme ba amogelwa, ba simolola dikgwebo dingwe; a e re pele ba batle tsela sentle gore ba ya kae, le gore, a mme ba ka goroga kwa ba yang teng.  A ba se tsewe fela ke pelo ya gore motho o batla go dira kgwebo, mme a sa itse sepe ka yone, ka jaana seo ke sone se felelang se dira gore ba tlhaelele nageng, ba palelwe ke go goroga kwa ba neng ba eleditse go ya teng.

Ntlha e nngwe e ne ya nna gore madi a a Youth Development Fund ga a na morokotso ope o o duelwang, fa e se fela go busa bontlha bongwe jwa one mo ngwageng tse tlhano motho a se na go thusiwa. Mme fa e ka re kwa morago ga direga gore motho a palelwe ke go duela, ga twe foo jaanong go tsenngwa morokotso wa botlhano mo lekgolong (5%).

E nngwe ntlha e ne ya nna gore ka batho ba thusiwa ka go farologana, lobaka kgotsa nako e ba e fiwang go duela madi ale, le yone e a farologana.

Ga twe fa motho a thusitswe ka dikgomo, o duela morago ngwaga tse tharo, wa dipodi morago ga ngwaga, fa ba dikgwebo tse dingwe bone ba duela morago ga kgwedi tse tharo kgwebo e sena go bulwa.

Godimo ga moo, e tshwanetse gore e re kgwedi le kgwedi go dirwe pego ya gore kgwebo e tsamaya jang; ke gore, a e tsweletse sentle kana golo gongwe e a reketla.

E ne e le dikgakololo tse dintle, tse ba ba batlang go itirela ditiro ka madi a a Banana, ba neng ba tshwanetse go di tlhwaela tsebe.

E ne e rile go le pele Mme Mooketsi a tlhalosa gore ke eng lenaneo le la Youth Development Fund le ne la dirwa. Pego ya re;

‘.....a re le simolodisitswe ka maikaelelo a go leka go thusa banana ba ba sa kgonang go bona ditiro gore ba bule dikgwebo go itshetsa le go tlhamela ba bangwe mebereko.’

Ga twe lenaneo le ne la simolodisiwa. Potso ke gore a lefoko ‘simolodisiwa’ le dirisitswe sentle fa? A go ne go sa tshwanela gore go twe lenaneo le ne la simololwa e seng la simolodisiwa? Gongwe o tlaa botsa gore pharologanyo ke eng fa gare ga mafoko? Pharologanyo ke gore go simolola ke go dira selo la ntlha. Fa ngwana a ne a ntse a sa tsene sekole, mme e le la ntlha a se ya, ga twe o ya go simolola sekole. Go simolodisa gone go raya go baakanyetsa go dira sengwe; go baakanyetsa tiro nngwe e e santseng e tlaa dirwa. A re tseye sekai ke se.

Polelo nngwe e bua ka ntlo nngwe e e neng e baakanyediwa go agiwa kwa motseng wa Mogapinyana. Dikgang/Daily News (Dikgang Labobedi Hirikgong 14 2014) ya re;

‘Mothusa Tautona .....o simolodisitse kago ya ntlo e e lopang madi a a fetang P200,000, kwa Mogapinyana.’ Lefoko ‘simolodisitswe’ e ntse ke leo.

Fa, Mmualebe o bona lefoko le le dirisitswe sentle ka jaana go ne go baakanyediwa tiro ya go aga, e e neng e santse e tlaa dirwa.  Ka nako eo, tiro tota e ne e ise e simologe, e ne e santse e baakanyediwa.

Ke sone se go tweng go ne go simolodisiwa kago ya ntlo eo. Fa jaanong tiro ya go aga e gorogile, re tlaa re e a simologa, ampo re re, e a simolola/simololwa, e seng e a simolodisiwa. Lefoko ‘simolodisiwa’ le setse le dirisiwa thata mo go lebegang le tlaa nyeletsa ‘simolola.’ A mme gone, nako nngwe, e a bo e se go simolola, go na le go simolodisa?

motshwanes@yahoo.com