Ontuetse ke mofenyi wa poko ya Setswana

Zolani Kraai | Wednesday July 6, 2016 15:17

 

Ontuetse le mmamogolokwane wa gagwe SENEPE: ZOLANI KRAAI

Mo kgaisanyong e e neng e tshwaretswe kwa sekoleng sa Westwood ka Labotlhano, o re tswang mo go ene, lekawana le la kwa Palapye, le ne la itlhaola mo badiragatsing ba bangwe bale borobabongwe go tswa kwa dikgaolong tse di farologaneng tsa Botswana.

Mme a fenya jalo dikete dile lesome tsa dipula (P10,000). Ontuetse yo gape a ipitsang ‘Tau ya Setso’ o fentse jalo kgaisanyo e ka poko  e aneng a e rulagantse ka go rotloetsa poloko ya ngwao, a bo a gakolola Batswana ka mananeo a puso a a tlhabolotseng lefatshe leno le batho ba lone. O bile a bua ka mananeo a a bolokileng setshaba sa Botswana jaaka a diritibatsi tsa diARV le go kgaola letlalo la bonna, a kaya jalo fa a ile a tokafatsa botsogo jwa bone ka teng.

Maemo a bobedi a ne a gapiwa ke Lucky Nkhurutshi wa Maun, ene a ikgapetse dikete tse di robang bongwe (P9,000).

Maemo a boraro a gapilwe ke Rosina Ranka, wa motse wa Sesung kwa kgaolong potlana ya Letlhakeng. Ranka yo e neng e le ene mosadi mo kgaisanyong eo, o ikgapetse dikete dile borobabobedi (P8,000).

Mo kgaisanyong ya poko ya Sekgoa, Mme Phodiso Modirwa wa kgaolo ya Gaborone, o ne a tswa mofenyi mme a ikgapela dikete tse some (P10,000).

O ne a salwa morago ke mme Koketso Marumo le Obakeng Kagiso ba Francistown ba atswiwa ka P9,000 le P8,000 ka go latelana. Ya re a lekodisa barati ba poko ba ba neng ba tsile ka dipalo tse di kgotsofatsang, mongwe wa baatlhodi yo gape eleng mmantswitswidi wa diteme ebile ele motlhatlhelela dithuto kwa mmadikolo (UB), Prof.

Thapelo Otlogetswe a bolela fa ba ne ba tlhoile tsebe go utlwa motswako wa poko ya Setswana e e nang le diane le maele gareng ga tse dingwe.

A re ba ne ba etse tlhoko thulaganyo ya mafoko le go tshameka sentle ka one. Ya re a konela dintlha tsa gagwe, Otlogetswe a re ele baatlhodi ba lemogile fa poko ya Setswana, mo kgaisanyong e, e ne e le boleng jo bo fa godimo gona le ya Sekgoa.

Bangwe ba baatlhodi e ne ele Tshireletso Motlogelwa, yo gape eleng mmoki gape ele morulaganyi wa kuranta ya mono gae ya The Business Weekly and Review, le Kenneth Moeng yo eleng morulaganyi wa mananeo a seromamowa sa Gabz FM.