Kgatelelo ya maikutlo a go tshela le HIV le tsholofelo

Puisanyo ya rona e leka go  tsibosa mmadi gore maikutlo a a tlhakatlhakaneng (stress) mme a le bokete (depression) a ka kgonwa go rarabololwa mme ka jalo tsholofelo e tshwanetse ya solofelwa nako le nako go re ele ruri o tla bona pholo.

Santlha a re ithute gore maikutlo a a bokete ke eng? Ke maikutlo a a botlhoko ebile a ka bakela motho go ikutlwa a latlhegile kana a sena kemonokeng mo bathong jaaka ba lelwapa, losika, ditsala kana badirikaene. O ka lemoga dikai tsa maikutlo a ka go nna o lapile, mo mosong o tsoga le go tlhola o lapile ka nako tsotlhe. O simolola o latlhegelwa ke keletso ya dilo tse o neng o rata go di dira. Maikutlo ga a ame tlhaloganyo fela mme le mmele. Bangwe ba re ba simolola go itemogela go ja phetelela fa bangwe ba re ba latlhegelwa ke keletso ya dijo.