Pele ga bokopano bogolo jwa BMD ka kgwedi ya Phukwi kwa Gantsi, go ne ga nna le dipuo tsa gore phathi e, e iphitlhela mo thankgeng ya seretse sa ngwaga wa leuba, jaaka go ne go tshwanetse go nne le maemo a komitikgolo a a neng a tshwanetswe go ya go lwelwa. Gareng ga maemo a, ya bo e le a bodulasetilo a a neng a lebagantse Nehemiah Modubule le Pius Mokgware, ba bobedi ba tsewang jaaka mekaloba ya polotiki ya kganetso.
Bangwe ba ne ba nganga ka gore tota ka Mokgware a le mo palamenteng ke eng a sa tlogele, Modubule a nna mo maemong a, fela bangwe ba re nnyaa, ga go a tshwanela go nne jalo ka gore Mokgware ka a le mo palamenteng go botlhokwa gore a bo a rwele le maemo a bodulasetilo. Dikgang tse tsa maemo a, tsa supa sentle fa makgamu a setse a bonala sentle mo BMD, mo le motho yo o kwa morakeng a kgonang go bona fela gore lebota la BMD le rantshegile. Fa dikgang le dintwa tsa maemo a komiti kgolo di ntse di taboga go ja naga pele ga phuthego kgolo, go ne ga tlhagoga dipuo tsa gore mongwe wa batlhami ba phathi e ya BMD, modulasetilo wa pele, ebile a kile a emela maemo a botautona jwa BMD, Sydney Pilane, o batla go boela mo phathing.
