Molelo wa kgolagano o raletse Kgatleng

Bakgatla ba o tshologela ka dipalo tse di kwa godimo thata go supa fa le bone ba tlhalogaya botlhokwa jwa one, le go ipelela dingwaga tse di masome matlhano tsa boipuso. Molelo o o goroga kwa motseng wa Malolwane gompieno go simolola leeto la one kwa metseng ya noka.Baagi ba Artesia mo kgaolong ya botlhophi ya Mochudi Bophirima, ba ne ba tsogela mo mekgwatlheng le go ya kwa kgotleng ya motse wa bone go ya go amogela molelo o wa kgolagano, le bagolo ba baeng ba ba neng ba tla ka one. Le fa go kile ga nna dipuo tsa matshosetsi mabapi le go ngala molelo ga morafe wa Bakgatla, se gase aka sa bonala sentle kwa Artesia le metse yotlhe e molelo o o setseng o e tsene, go lala le go feta mo go yone.

Fa a amogela molelo, kgosi ya Artesia le Leshibitse, Kgosi George Thwane, o ne a bolela fa go le botlhokwa thata gore Motswana mongwe le mongwe a ikamanye le one. A re o itumela le go leboga thata go bona morafe wa gagwe o tshologetse ka dipalo tse dintsi go le kana. A re se ke gone go supa fa ba tlhaloganya se tota molelo o o se kayang.