Motshela le mogare o kopa tiro
Wednesday, November 04, 2015
![Onkemetse Louis](https://cdn4.premiumread.com/?url=https://www.mmegi.bw/uploads/imported_images/2015/november/04/php658F.tmp.jpg&w=400&q=72&f=jpg)
Onkemetse Louis
Louis yo e leng motho wa letso la Sesarwa kwa Motlhabeng o ikuetse jalo mo bekeng e e fetileng fa Naledi e ne e jetse nala kwa lefelong leo. E rile fela fa a lemoga Naledi, Louis, a simolola go putsaputsa dikeledi, fa ka legano a punpunyolola kutlobotlhoko e e mo pelong ya gagwe. A re o fa gare ga dinaka tsa kukama ka ntlha ya gore o tshela le mogare mme a sa bereke. O tlhaloseditse Naledi gore ke ngwaga wa bobedi a ntse aa nwa diritibatsi e bile o ikamogetse fela sentle mme molato wa kgeleswa ke gore o nwela dipilisi mo tlaleng ka ntlha ya gore ga a bereke. Onkemetse yo o feletseng ka lekwalo la bone fela kwa sekoleng se sepotlana, a re o batla tiro nngwe le nngwe letsatsi le letsatsi mme go a pala, ka le kwa go yone Ipelegeng tota a sa kgone go thapiwa ka ntlha ya bontsi jwa batho ba motse wa Letlhakane.
A re o tshelela mo tshotlegong e e matlho mahibidu, ka le jone bonno jwa gagwe tota e se jwa sepe. O nna mo mogoafatsheng o o dirilweng ka dipolaseteke. A re o kile a ya go ikuela kwa go ba boipelego mme ba mo gakolola go batla tiro ka a santse a ikutlwa. Le fa go ntse jalo, Onkemetse a re ga se gore o lelela go phakisiwa dijo tsa ba boipelego mahala, o a tlhaloganya fela o kopa gore a batlisiwe tiro ka e bile a na le bana ba le babedi, ba le bone ba sotlwang ke tlala botlhoko. A re go bolawa ke tlala moo go ama botsogo jwa gagwe ka a nwela dipilisi mo tlaleng mme a ikutlwe a tlhaela gotlhelele. ‘’Kana mo malatsing ano fela fa ke sena go nwa dipilisi ke a kgwa mme seo se dira gore dipilisi di seka tsa bereka sentle mo mmeleng. Tlhe batho ke kopa thuso le fa ke le Mosarwa jaana, tsweetswee,’’ ga bua Onkemetse a rothisa keledi.
These roads, which are vital conduits for trade and tourism, have long been in dire need of repair. However, while this development is undoubtedly a positive step, it also raises questions about broader issues of infrastructural management and road safety that deserve closer scrutiny.The A3 and A33 roads are not just any roads, they are critical arteries that connect Botswana to its neighbours and facilitate the movement of goods and people...